قصيدة "غيبة سنه" للشاعر الكبير سليم شلهوب

غيبة سنه




صرلك سنه. ماعرفت شو صابك
هجرت الحبيب وطوّل غيابك
لا تحممو رموشك بدمع الشوق
ولا كنت تستفقد لأحبابك

وبعدو حبيبك ناطرك تا تعود
من بعد غيبة عام عا ربوعك
تا يكحّل النظره بعيون السود
ويغمرك. ويكسّر ضلوعك

شو باك لا كلمه ولا شهقه
لا شوق لا لهفه ولا مرسال
وعدني دقيقة وقت بالملقى
يما ببالك كون شغلة بال

شفتك بنومي بعجقة الأحلام
بصدرك مرض عم يزرع العنّه
ومن وقتها بنام وما بقدر نام
وبدعي على اللي بيعدك عنّي

كان الورد مدبوح عا خدّك
واليوم خدك تشرنو ورودو
والكان حلمو تقشعو حدّك
ممنوع حتى تحس بوجودو

ليش حتى هيك فينا صار
نكفر بوعد نعيش بالجنه
ما عرفت مين الزتنا بالنار
نحنا أم الشيطان أم هنّي

شو فيك ما بعرف شو يلّي فيك
رغم ً الجفا ما قدرت ما حبك
من بعد ما كنت لحياتي شريك
صار دربي بعيد عن دربك
كل يوم بطلب ربنا يشفيك
حتى عليي لو علنت حربك
وعاديتني برفض أنا عاديك
موجود أو مطرود من قلبك