حوار طريف جرى بين  الشاعر طوني شلهوب ووالده الشاعر سليم شلهوب

الحوار

سليم شلهوب:
الرجال لو بيكون زندو مطحني
وشموخ راسو متل قبّة ميدني
مجبور راسو ينحني قبال الحلا
ولولا ما بيّك ينحني حنية صلا
من بطن إمك ما طلعت على الدني ههههههههه

طوني شلهوب:
انشالله يا بيّي تعيش للميّة سنة
وتضلّ تكفي جوعنا كلما نجوع
وهاك اللي فيك معلّمك عالشيطنة
انشالله بيحني وما بقى يشمخ طلوع

سليم شلهوب:
رديت عا بيك شعل فيه الغضب
النكران كلو عليك وعليي العتب
كيف لاك عين تهين يلِّي خلّفك
وتدعي على اللي كان لوجودك سبب

طوني شلهوب:
بحق الوجدني بضل يا بيّي وفي
بس العجب .. لا تاب بعدو ولا غفي
المفروض يطلع عالتقاعد من زمان
ولا يضلّ طالع طلعتو .. وما يكتفي

سليم شلهوب:
ما زال راسي ما حصد لونو المشيب
وما زال عمري ما تعلّق عالصليب
بيضل راسو يشمخ ويطلع طلوع
كل ما فؤادي تجرحو نظرة حبيب

طوني شلهوب:
فضيو جيابي تا حبوبك إشتري
وكل ما بودّي .. بترجع تقلّي : كمان
من ميل حبّة للضغط والسكّري
ومن ميل حبّة تعنترك بالإمتحان

سليم شلهوب:
يا شب حاجي تضحك على شيبتي
ما بعدك بترجف قصب من هيبتي
وبعدك بعيني طفل بسنان الحليب
لمّاتجوع برضّعك من جيبتي

طوني شلهوب:
من بعد ما بحضنك دقت طعم النعيم
كبرت .. وإلك تا سدّد الدين القديم
بيكفي وقت ما مين إنت بيسألوك
تقلّن بو طوني إنت .. ما تقلّن سليم

سليم شلهوب:
بشوف حالي بشعرك الراقي الغني
لاكن بإسمك ما بريد تهتّني
بكرا عند ما يصير إسمك بو سليم
بيصير فيك تشوف حالك عالدني

طوني شلهوب:
بيخلق بو طوني وبو سليم بكلّ جيل
وحدو الفعل عن شخصنا بيعطي دليل
معقول إبني يخلق ومتلك يكون
لكن تا يخلق بعد متلي .. مستحيل

سليم شلهوب:
من منهلي سقيتك يا مغرور الشعور
تا صرت شمس الشعر والباقي بدور
ولمّا حملت سلاح نكران الجميل
بلّش ضميرك يسكر بخمر الغرور

طوني شلهوب:
مع إحترامي للورد بالمسكبة
ولإخوتي البنتين ولخيّي الأبي
لو كان فضل الموهبة الـ فيّي إلك
بتجيب متلي كنت بنتين وصبي

سليم شلهوب:
عطيت خيّك صيت بالكون نتشر
وعطيت إخواتك حلا وذوق وبُشَر
ولما وهبتك عاطفة قلبي الحنون
وحملت إسمي شفت حالك عالبشر

طوني شلهوب:
مين اللي ياما قال موهبتك تروك
وعيف الشعر ما الشعر ما بيعمل ملوك
ومن يومها لو إسمعك .. كلّ البشر
كل يوم كانو ألف لعنة بيلعنوك

سليم شلهوب:
ودّيتك على الغرب تا شوفك ملك
وبالهندسه يضحك إلك مستقبلك
شو كان موقف والدك تا ما تضيع
وجِّه سؤالك يا وفي منَّك إلك

طوني شلهوب:
قرّرت عنّي .. ومتل ما بتريد صار
لكن لا تجرحني وتدعي الإفتخار
بخصوص هالنزعة الكئيبة بداخلي
من واجبك تندم يا بيّي عالقرار

سليم شلهوب:
بحبّك جرح غيتار ما بريدك صنم
بحبّك بعلم الهندسه تصفّي علم
بفضل النصيحه ربحت يا طوني التنين
وبتريد بيّك يشعر بوخز الندم ؟!!!!