قصيدة "يا قلب" للشاعر سليم شلهوب

ياقلب

يا قلب بدّل نظرتك فيها
خلصنا بقا ترجّيتها كفايي
حرّر زرارك من عراويها
ولوّن سما إيامك الجايي
بقلك محيها. بنارك كويها
ودوّن لقصة حبك نهايي
لا كان عندك قلب تمحيها
ولا كنت تستهدي عا محّٰايي

حبّيتها وزرعتها جوّا
بدمّك بدفقة نبض دقّاتك
متل الخروف القشّع وجَوّا
وهيي طمعها بطيب لحماتك
دخلت عا فردوسك متل حوَّا
تا تقطف عناقيد عنباتك
جوّك بعيد كتير عن جَوّا
وما بتقرب ذاتها ذاتك

يا ريت بعدك يا قلب فاضي
لا جمر. لا لهفات لا نهدات
يا ريت بعدك قانع وراضي
وعايش على ذكرى الحبيب المات
من بعد ما دخَّلْت عا حواضي
ورده بغصنا بيجرحو الشوكات
لا عاد فيك ترجّع الماضي
ولا عاد فيك تكفكف الدمعات

روحي ضْهَري الله معك روحي
ما زال إختك صارت المرجع
لاكن معك لا تاخدي روحي
بتصير فيكي الروح تتوجّع
روحي وبسرّ الآخ لا تبوحي
تا ما بقلبك جمرها يولع
لا عدت قادر إشرب جروحي
ولا عاد عندي عيون تا تدمع

شوفي معك.ما أروع الضحكه
لمّا بتلبس من شفافك زيّ
كتافك عا كتف الزوج عم تتكي
ووجهك مشعشع بين إبن وبيّ
وتم الخمر بالكاس عم يحكي
وناطر على شفافك ينزّ شوي
مين الببحرك نزّل الشبكه
والطعم فيها جسم سمكه حيّ
يا جاهله. ما بتعرفي السمكه
بتموت. لمّا تطلع من الميّ ؟!!!!