قصيدة بعنوان " تيابك " بقلم الشاعر سليم شلهوب

تيابك




بعدت عنّي وطوّل غيابك
ومتل الغراب نسيت أحبابك
لاكن معي من بعد طول الهجر
بخزانتي باقي مع تيابك

وتا ما الذكرى تشرب عيوني
كل ما بإيدي إفتح الدرفه
فيَّقت صوت العقل بظنوني
وقرّرت هجّرهن من الغرفه

وإنتي ما بدّك ترجعي عالدار
تا تريحيني ومعهن تفلّي
ما قبلت قطعه واحده تذكار
من إتِر جسمك بالدِّرَف خَلّي

ويا ما في ناس بواقع التهجير
جسمها عاري بدون تياب
بيعرفو إنك كريمه كتير
وزَّعتن بإسمك بدون حساب

وتا تلَبّسي هالناس من جودك
عن كبر قلبك بالمليح حكيت
وقلت الله يسعد وجودك
وقلت الله يرحمك. وبكيت