قصيدة للشاعر سليم شلهوب بمناسبة عيد ميلاد إبنته أنياس ١٧/٩/١٩٨٤

بمناسبة عيد ميلاد إبنته أنياس ١٧/٩/١٩٨٤





خلقتي بشهر أيلول يا أنياس
لاكن ورد نيسان خدّك باس
أيلول ضوّالك شموع العيد
ولبّسك نيسان توب جديد
والله رسم وجهك بحبر الإيد
وصبّك بقالب عاطفه وإحساس
بموت إمّك شو كبر همّك
الكانت بلهفة قلبها تضمك
وتا يعوّض عليكي حنان الإم
ويمسح عن خدودك خطوط الهمّ
كان بيّك بيّك وإمّك
ومن بعد ما صارو الورود قمار
راني الحبيبك كان زوجك صار
ولمّا الأمومه شعلت بروحك
جبتي ولاد وبلسمو جروحك
وعم تحلمي بكرا يصيرو كبار
صار عمري أربعه وستّين
وما يبّس وراقي هوا تشرين
بلون البنفسج بعدن خدودك
لا تفزعي ما بيدبلو ورودك
ولو كان صفّى عمرك تلاتين