قصيدة إحتلت المركز الثاني في مسابقة الشعر - للشاعر سليم شلهوب

مبارح كنت عم إنبش ترابي --- وعايش ملك ما بين أترابي
حولي صبايا بعدن فرافير --- وحدي الحبيب وكلن حبابي
حاكم بأمري طيور وعصافير --- بمارس عليهن حكم إرهابي
وتا الشمس تشرق عالدني بكير --- بيوقف يدقّ الفجر عا بابي
واليوم خلفي الموت وحش كبير --- منو أنا هارب بسرسابي
فرقة نمورا نيابها مسامير --- بتمحي حضوري بتكتب غيابي
يا طير نحنا متلك قراقير --- بغابة دياب. نفوس مرتابه
عن حالك وحالي كتبت تقرير --- حفظتو قصيده بصفحة كتابي
شرعة الغابه. كلها تزوير --- وشرعة الإنسان كذابه
ما في فرق بالظلم والتعتير --- ما بين نحنا بشرعة الإنسان
وما بين إنتو بشرعة الغابه