قصيدة بعنوان "صدق" للشاعرة اللبنانية نور أبو طرية

صدق اذا هالقلب ما غنى
وكسر سكوت الصمت والضحكة
تا يحن قلب العمر بتمنى
نرجع سوا تا وعدنا يحكي

صدق بوقتو العمر حرقصنا
تشردق سهرنا بتخت ايامي
ما الدمع متل الجمر غصصنا
ورشرش رماد الحزن قدامي

صدق انت بكنيسة الاوهام
قداس صار العشق بخورو
من فوق شمع وعودنا لو حام
نبيذ المحبة بتنشف بحورو

صدق ما بين ضلوع سكنتك
مصلوب قلبي وزهر نيساني
وبريشة النهدات لونتك
بدمعة عراوي عطور ذبلاني

صدق انت والحرف محبرتي
وشعري للي ذابو بيوت سرسابو
وبينك وبين الشوق مشورتي
تفلفش ندي دنقان عا بوابو
تسافر ببحر اللوم باخرتي
تجمع حبوب الملح بعبابو
ولما تدق بشط آخرتي
مطرح ما عشقي سكر حسابو
تقرب ترشو حول مقبرتي
الروح اللي بتسافر ما رح ترجع
وعتم الكفن وما بيشبه تيابو