قصيدة بمناسبة حلول عيد الأضحى المبارك بعنوان "شو العيد !!!!!" للشاعر سليم شلهوب

شو العيد



يا عيد منّك عيد عم نشحد
فرقنا بلا طلّه وبلا مواعيد
نطرناك حتى تطلّ عالموعد
جايي وبصابيعك جمر وجليد
العيد نور وقلب عم يسعد
وأحلام طفل بلبس توب جديد
نطرنا العيد من المدى الأبعد
وقرّب لعنا بس بعدو بعيد
وداعش. تا تحجز بالسما مقعد
شعّلت أجساد الطفالى وقيد
طفلك دبحتو قبل ما يولد
وقفّيت دماتو بكاس نبيد
القرآن كلمة ربنا الأوحد
ممنوع يلمسها الكفر بالإيد
وإنت قلي مين عم تعبد
عم إسألك جاوب إذا بتريد
طوني فرح بالعيد مع أحمد
معنا إنت عم تفرح بهالعيد ؟!!!